आईसीसी महिला टी–२० : थाइल्याण्डसँग नेपाल सुपर–थ्रीमा पराजित

काठमाडौं– आईसीसी महिला टी–२० विश्वकप एसिया छनोट अन्तर्गत सुपर–थ्रीको दोस्रो तथा अन्तिम खेलमा नेपाल पराजित भएको छ ।

थाइल्याण्डको बैंककस्थित टेर्डथाइ क्रिकेट मैदानमा आज भएको खेलमा नेपाल घरेलु टोली थाइल्याण्डसँग ७८ रनले पराजित भएको हो ।थाइल्यान्डले दिएको १ सय ५९ रनको लक्ष्य पछ्याएको नेपाल निर्धारित  २० ओभरमा ९ विकेट गुमाएर ८० रनमा समेटियो ।नेपालकी कविता कुँवरले २४, राजमति ऐरीले २० र रुविना क्षेत्रीले १२ रन बनाए । अन्य खेलाडीले दोहोरो अङ्क जोड्न सकेनन् ।

थाइल्यान्डकी ओन्निचा कामचोम्फुले चार, थिपाचा पुथावोङले तीन तथा सुलेपोर्न लाओमीले एक विकेट लिए ।यसअघि टस हारेर पहिले ब्याटिङको निम्तो पाएको थाइल्यान्डले निर्धारित २० ओभरमा दुई विकेटको क्षतिमा १ सय ५८ रन बनाएको थियो ।नेपाल र थाइल्यान्ड यसअघि नै विश्वकपको ग्लोबल छनोटमा पुगिसकेका छन् ।