भारत पाकिस्तानबीच आज प्रतिस्पर्धा, एउटै टिकटको मूल्य १ लाख १७ हजार!

टी-२० विश्वकप अन्तर्गत समूह ‘ए’ अन्तर्गतको तेस्रो खेलमा आज भारत र पाकिस्तान प्रतिस्पर्धा गर्दैछन्। समूहमा दुबै टोली अपराजित रहेकाले यो खेल ‘सुपर एट’का लागि समेत महत्वपूर्ण मानिएको छ।

श्रीलंकाको कोलम्बोस्थित आर प्रेमादशा क्रिकेट मैदानमा हुने खेलमा यी दुई छिमेकी बीचको खेल साँझ ७:१५ बजेदेखि सुरु हुनेछ। कोलम्बोमा अहिले वर्षा भइरहेको छ साथै आइतबार दिनभरि पानी पर्ने अनुमान छ।

तर खेलको समयमा वर्षा हुने सम्भावना करिब १० प्रतिशत मात्र रहेकाले खेल हुने अनुमान गरिएको छ। भारतले सन् २००७ र २०२४ मा टी-२० विश्वकप जितिसकेको छ। आफ्नो पहिलो उपाधि सन् २००७ मा पाकिस्तानलाई फाइनलमा हराउँदै जितेको थियो। अर्कोतर्फ, पाकिस्तान सन् २००९ को च्याम्पियन हो भने टोली २००७ र २०२२ मा उपविजेता बनेको थियो।

भारत र पाकिस्तानबीचको खेल दुई देशबीचको प्रतिष्ठाको रुपमा समेत हेरिने गरेको छ। यही खेलका लागि भारतबाट कोलम्बोको फ्लाइट टिकटसमेत अत्याधिक महंगो भएको छ। साथै खेल हेर्ने टिकटको मूल्यसमेत आकाशिएको छ। कोलम्बोमा खेलको तयारीसँगै टिकटको मूल्य २.५ लाख श्रीलङ्काली रुपैयाँ (१ लाख १७ हजार) सम्म पुगेको छ।

साथै उडान भाडा करिब १ लाख ११ हजार भारतीय रुपैंया (करिब १ लाख ६२ हजार) पुगेको छ। कोलम्बोका होटलहरू पूर्ण रूपमा भरिएको भारतीय सञ्चारमाध्याम एभिपि न्युजले जनाएको छ। साथै सहर पूरै भारत-पाक म्याचको माहोलले गुञ्जिएको छ। यी दुई टोलीको खेलका कारण कोलम्बो शान्त पर्यटकीय गन्तव्य एकाएक कडा सुरक्षा कायम गरिएको छ। आज भारत र पाकिस्तानबीचको बहुप्रतिक्षित भिडन्तले श्रीलङ्काभर आर्थिक र व्यवस्थापकिय रुपमा ठूलो र महत्वपूर्ण मानिएको छ।

श्रीलंकाका राष्ट्रपतिकै आग्रहमा भारतसँगको खेल वहिष्कार गर्ने राजनीतिक निर्णयमा पुगेको पाकिस्तानले पुन खेल खेल्ने निर्णय लिएका थिए। श्रीलंकाले आफूले पाकिस्तानलाइ गम्भिर अवस्थामा गएर क्रिकेट खेलेको सम्झाएको थियो।

उनले अहिले श्रीलंकाको आर्थिक अवस्थाका लागि यो खेल निकै महत्वपूर्ण रहेको भन्दै खेल खेल्न पाकिस्तानलाई आग्रह गरेका थिए। साथै आइसीसी र बीसीसीआइले समेत पाकिस्तानलाई खेल बहिष्कार नगर्न आग्रह गरेका थिए। साथै ठूलो आर्थिक सहयोगको आश्वासन पाकिस्तानलाई दिएपछि उनले भारतसँग खेल खेल्न सहमति जनाएका थिए।