डीपीले बालेन प्रधानमन्त्री बन्ने सम्झौता थाहा छैन भनेका हुन् ? यस्तो थियो सवालजवाफ

काठमाडौं । काठमाडौं ९ बाट अत्यधिक मतले जितेका रास्वपा उपसभापति डीपी अर्यालले दिएको एउटा अभिव्यक्तिको भिडिओ क्लीप सामाजिक सञ्जालमा भाइरल भइरहेको छ ।

उनले पार्टी उपसभापति बालेन्द्र साहलाई प्रधानमन्त्री बनाउने सम्झौतारे अनभिज्ञता दर्शाएको भनेर कतिपयले आलोचना गरेका छन् ।चुनाव जितिसकेपश्चात सञ्चारकर्मीसँग डीपीले हिजो थोरै सवालजवाफ गरेका थिए । एक सञ्चारकर्मीले उनलाई बालेन्द्र साहसँग भएको सम्झौताको विषय कोट्याउँदै त्यसमा रास्वपा इमान्दार रहन्छ कि रहँदैन भन्ने खालको प्रश्न गरे । त्यसमा डीपीले दिएको जवाफ भाइरल भएको हो ।

पत्रकार र डीपीबीच भएको सवालजवाफको अंश यस्तो छः
पत्रकारः दुई तिहाइको सरकार भइसकेपछि पार्टीभित्र अब खटपट सुरू हुने र फुट्ने आशंका पनि धेरैले गरेका छन्, तपाईं के भन्नुहुन्छ ?
डीपीः तपाईंले जनतालाई अलिकति भए पनि भ्रम छरिदिउँ भनेर गरेको प्रश्न जस्तो लाग्छ यो । यस्तो प्रश्न नै बन्द गरिदिनुस । तपाईँहरू हामीलाई मोटिभेसन दिनुस न । जनतालाई यस्तो समाचार पठाइदिनुस कि…
पत्रकार- यो प्रश्न सोध्ने स्थिति बन्छ कि बन्दैन, त्यो भन्नुस्…

तपाईँले अहिले नै सोधेर गलत गर्नुभयो । यो प्रश्नै नसोध्नुपर्ने हो । रास्वपालाई माया गर्नेहरू पार्टीका कार्यकर्ता र सदस्य मात्र हुन् भनेर नबुझिदिनुहोला । रास्वपालाई माया गर्ने तमाम तपाईँहरूजस्तै दाजुभाइ दिदीबहिनी हो । उहाँहरूमाथि अन्याय हुनु हुन्दैन । हामीबाट त्यस्तो कदापी हुन सक्दैन । हामी इमान नगुमाइकन काम गर्छौँ ।

पत्रकारः बालेन्द्र साह भावी प्रधानमन्त्रीका उम्मेदवार हुनुहुन्छ अहिलेसम्म पनि । सम्झौतामा भनिएको छ, बालेन्द्र साह ५ वर्षका लागि प्रधानमन्त्री हुनेछन् । पार्टी सभापति रवि लामिछानेले सम्हालेछन् भनिएको छ । यो सम्झौतामा कहीँ पनि तलमाथि हुँदैन ?
डीपीः त्यो सम्झौतामा के लेखिएको छ मैले नै एकचोटि हेर्नुपर्छ । मलाई सबै कण्ठ छैन । तपाईँले भनेको कुरा यदि लेखिएको रहेछ भने त्यसमा जे लेखिएको छ त्यही हुन्छ ।

पत्रकारः भनेपछि त्यो सम्झौतभन्दा एक इन्च पनि तलमाथि हुँदैन ?
डीपीः त्यो मैले तपाईँसित वाचा गर्नुपर्ने त आवश्यकता देख्दिनँ । पार्टी निर्माण हुँदैछ । पार्टीबाट निर्वाचित भएर नेताहरू आउनु हुन्छ । वरिष्ठ नेता, सभापतिज्यूहरू पार्टीको केन्द्रीय समिति छ, त्यसमा छलफल होला । संसदीय दल बन्छ । त्यहाँबाट हुँदै जाने निर्णयलाई तपाईं हामीले मान्नुपर्छ ।

पत्रकारसँगको सवालजवाफमा डीपी अर्यालको मुख्य आशय सम्झौतामा जे लेखिएको छ त्यही हुन्छ भन्ने थियो । पत्रकारले सरकारसमेत बन्न नपाइ पार्टीभित्र खटपट र सम्भावित विभाजनको कुरा गर्न थालेपछि अर्याल अलिकति आवेगमा पनि आएका थिए ।

उनले सम्झौतामा के लेखिएको छ, मलाई कण्ठ छैन, एकचोटि हेर्नुपर्छ भनेका छन् । खासमा पत्रकारले दाबी गरेजस्तो सम्झौता बालेनसँग भएको छैन । रास्वपा र बालेनबीच गत पुस १३ गते ७ बुँदे सम्झौता भएको थियो । सम्झौताको चौथो बुँदामा भनिएको छ, राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र साह हुने । पत्रकारले भनेजस्तो ५ वर्षका लागि बालेन प्रधानमन्त्री बन्ने सम्झौतामा उल्लेख छैन । त्यही भएर अर्यालले सिधा जवाफ दिन नसकेका हुन् ।

सम्झौतामा नलेखिएको भए पनि बालेनको कार्यकाल आधारभूतरूपमा ५ वर्ष नै हो । यसमा रास्वपा नेतृत्व प्रष्ट छ । यद्यपि, सरकारको कार्यसम्पादनले पनि यसको आयू निर्धारण गर्ने पार्टीका नेताहरू बताउँछन् ।
एक पदाधिकारीले भने, ‘हाम्रो बुझाइ ५ वर्षकै लागि भन्ने हो । तर, सम्झौतामा लेखिएको छैन । यदि सरकारले सोचेजस्तो डेलिभरी दिन सकेन र बीचमै अलोकप्रिय भएर गयो भने सोच्नुपर्ने अवस्था पनि आउन सक्छ । कार्यसम्पादन राम्रो भयो र जनता सन्तुष्ट भए भने बालेनले नै पाँच वर्ष चलाउनु हुन्छ ।’